ಲೊರೆಟ್ಟೊಂತ್ ಇಂಗ್ಲೀಷ್ ಮಾಧ್ಯಮ್ ಇಸ್ಕೊಲ್ ಉಗ್ತಾವಣ್
ಲೊರೆಟ್ಟೊ ಫಿರ್ಗಜಿಚೊ 70 ವರ್ಸಾಂಚೊ ಜುಬ್ಲೆವ್ ಆಯ್ಲೆವಾರ್ ಸಂಭ್ರಮಾನ್ ಆಚರ್ಸಿಲ್ಲೊ ಉಡಾಸ್ ಕಾಳ್ಜಾ-ಮನಾಂನಿ ಜಿವೊಚ್ಚ್ ಆಸ್ಚ್ಯಾ ಸಂದರ್ಭಾರ್ ಹಾಂಗಾಸಾರ್ 11.06.2010ವೆರ್ ಸವಿ ಕ್ಲಾಸ್ ಇಂಗ್ಲೀಷ್ ಮಾಧ್ಯಮಾಚಿ ಸುರ್ವಾತ್ ಜಾಲಿಚ್ಚ್. ಕಥೊಲಿಕ್ ವಿದ್ಯಾಬೋರ್ಡಾಚೊ ಕಾರ್ಯದಶಿ ಮಾನಾದಿಕ್ ಬಾಪ್ ವಿಲ್ಸನ್ ಡಿ’ಸೋಜಾನ್ ಫಿರ್ಗಜ್ ವಿಗಾರ್ ಮಾ. ಸಿಪ್ರಿಯನ್ ಪಿಂಟೊ, ಉಪಾಧ್ಯಕ್ಷ್ ಶ್ರೀ ಜ್ಯೋ ಕುವೆಲ್ಲ್ಯೊ, ಕಾರ್ಯದರ್ಶಿ ಶ್ರೀ ಹ್ಯೂಬರ್ಟ್ ಲೋಬೊ, ಆದ್ಲೊ ಉಪಾಧ್ಯಕ್ಷ್ ಶ್ರೀ ವಾಲ್ಟರ್ ನೊರೊನ್ಹಾ ಸಂಗಿ ದಿವೊ ಪೆಟವ್ನ್ ಇಸ್ಕೊಲಾಚೆಂ ಉಗ್ತಾವಣ್ ಕೆಲೆಂ. ಅಧ್ಯಕ್ಷ್ ಸ್ಥಾನ್ ಘೆತ್ಲ್ಲ್ಯಾ ಮಾ. ವಿಲ್ಸನ್ ಡಿ’ಸೋಜನ್ ಫಿರ್ಗಜ್ ವಿಗಾರ್ ಮಾ. ಸಿಪ್ರಿಯನ್ ಪಿಂಟೊಚಿ ಮಿನತ್ ವಾಖಣುನ್ ತಾಣೆ ಸೆವಾ ದಿಲ್ಲ್ಯಾ ಹಿರ್ಗಾನ್, ಗುರ್ಪುರ್ ಆನಿ ಲೊರೆಟ್ಟೊ ಫಿರ್ಗಜಿಂತ್ ಊಂಚ್ಲಿ ಸೆವಾ ದಿಲ್ಯಾ ಮಾತ್ರ್ ನೈಂ ಆಸ್ತಾಂ ಇಗರ್ಜೆ ವಠಾರಾಂತ್ ಸೊಭಾಯ್, ನಿತಳಾಯ್, ಶಿಸ್ತ್ ಆನಿ ಭಕ್ತ್ ಚಡಯ್ಲ್ಯಾ ಮ್ಹಣೊನ್ ಅಭಿನಂದನ್ ಪಾಟೊವ್ನ್ ಲೊರೆಟ್ಟೊಂತ್ ಇಂಗ್ಲೀಷ್ ಮಾಧ್ಯಮ್ ಇಸ್ಕೊಲಾಕ್ ಉಜ್ವಲ್ ಭವಿಷ್ಯ್ ಆಸಾ ಮ್ಹಣೊನ್ ಸಂದೇಶ್ ದಿಲೊ.
ಹೆಂ ಇಸ್ಕೊಲ್ ಆಸಾ ಕರುಂಕ್ ಮಿನತ್ ಕಾಡ್ಲ್ಲ್ಯಾಂಕ್ ವಿಗಾರಾಂನಿ ಫುಲಾಂ ತುರೊ ದೀವ್ನ್ ಉಲ್ಲಾಸಿಲೆಂ. ಮುಖೇಲ್ ಮೆಸ್ತಿರ್ಣ್ ಭಯ್ಣ್ ಲೀನಾ ಪಿರೇರಾನ್ ಧನ್ಯವಾದ್ ಪಾಟೈಲೆ. ಇಸ್ಕೊಲಾಚಾ ಭುರ್ಗ್ಯಾಂ ಸಾಂಗಾತಾ ತಾಂಚಿ ವ್ಹಡಿಲಾಂ ಆನಿ ಫಿರ್ಗಜಿಚೊ ಲೋಕ್ ವ್ಹಡಾ ಸಂಖ್ಯಾನ್ ಹಾಜರ್ ಆಸ್ಲ್ಲೊ. ನಿಮಾಣೆಂ ಸಮೇಸ್ತಾಂಕ್ ಗೊಡ್ಶೆಂ ಆನಿ ಥಂಡ್ ಪೀವನ್ ವಾಂಟ್ಲೆಂ.
2011ವ್ಯಾ ವರ್ಸಾ ಲೊರೆಟ್ಟೊ ಇಸ್ಕೊಲ್ ಶತಮಾನ್ ಆಚರ್ಸಿತಾ ಮ್ಹಣೊನ್ ವಿಗಾರಾನಿಂ ಸಭೆಕ್ ತಿಳ್ಸಿಲೆಂ.
Popularity: 5% [?]
