ವಾಡ್ಯಾವಾರ್ ಕ್ರಿಕೆಟ್ ತಶೆಂಚ್ ದೊರಿ ವೊಡ್ಚೊ ಪಂದ್ಯಾಟ್
ಭಾರತೀಯ್ ಕಥೊಲಿಕ್ ಯುವಸಂಚಾಲನ್ ಲೊರೆಟ್ಟೊ ಫಿರ್ಗಜೆಚ್ಯಾ ಸರ್ವ್ ವಾಡ್ಯಾಗಾರಾಂಕ್ ಸಾಂಗಾತಾ ಹಾಡ್ಚೆ ಖಾತಿರ್ ಜನೆರ್ ೨೪ವೆರ್ ಕ್ರಿಕೆಟ್ ತಶೆಂಚ್ ದೊರಿ ವೊಡ್ಚೊ ಸ್ಪರ್ದೊ ಮಾಂಡುನ್ ಹಾಡ್ಲ್ಲೊ. ಉಗ್ತಾವಣ್ ಕಾರ್ಯಕ್ ಫಿರ್ಗಜ್ ವಿಗಾರ್ ಮಾ.ಬಾ. ಸಿಪ್ರಿಯನ್ ಪಿಂಟೊ ಸಂಗಿ ಫಿರ್ಗಜ್ ಉಪಾಧ್ಯಕ್ಷ್ ಜ್ಯೋ ಕುವೆಲ್ಲೊ, ಕಾರ್ಯದರ್ಶಿ ಹ್ಯೂಬರ್ಟ್ ಲೋಬೊ, ಸಲಹಾದಾರ್ ರೋಶನ್ ಪಿಂಟೊ, ಅಧ್ಯಕ್ಷ್ ಪ್ರವೀಣ್ ಡಿ’ಸೋಜ ಹಾಜರ್ ಆಸ್ಲ್ಲೆ. ಆಮ್ಚಾ ಮೊಗಾಳ್ ವಿಗಾರಾಂನಿ ಪಂದ್ಯಾಟ್ ಉಗ್ತಾವಣ್ ಕರ್ನ್ ಸಗ್ಳ್ಯಾ ಕಾರ್ಯಕ್ ಯಶಸ್ವಿ ಮಾಗ್ಲಿ. ಹ್ಯಾ ಪಂದ್ಯಾಟಕ್ ರೆಫ್ರಿ ಜಾವ್ನ್ ಶ್ರೀ ಮನೋಹರ್, ಸೂರಜ್, ಪ್ರದೀಪ್ ಹಾಜರ್ ಆಸೊನ್ ಪಂದ್ಯಾಟ್ ಬರ್ಯಾ ಥರಾನ್ ಚಲವ್ನ್ ವೆಲೆಂ. ತಶೆಂಚ್ ದೊನ್ಪರಾಂ ಉಪ್ರಾಮತ್ ದಾದ್ಲ್ಯಾಂಕ್ ತಶೆಂಚ್ ಸ್ತ್ರೀಯಾಂಕ್ ದೊರಿ ವೊಡ್ಚೊ ಸ್ಪರ್ಧೊ ಮಾಂಡುನ್ ಹಾಡ್ಲ್ಲೊ. ಆನಿ ತ್ಯಾ ಸ್ಪರ್ಧ್ಯಾಂತ್ ಪೈಪೋಟಿ ಆನಿ ಉಮೆದ್ ಇತ್ಲಿ ಆಸ್ಲಿಕೀ ದೊರಿ ಖಂಚಾಯೀ ಕುಶಿನ್ ವಚೊಂಕ್ ಆಯ್ಕನಾತ್ಲ್ಲಿ. ಕ್ರಿಕೆಟ್ ಪಂದ್ಯಾಟಾಂತ್ ಪಯ್ಲೆಂ ಸ್ಥಾನ್ ಲೂರ್ಡ್ಸ್ ವಾಡ್ಯಾಕ್, ದುಸ್ರೆಂ ಸ್ಥಾನ್ ಕುಪ್ರಾಡಿ ವಾಡ್ಯಾಕ್ ಆನಿ ತಿಸ್ರೆಂ ಸ್ಥಾನ್ ದುಃಖಿಸಾಯ್ಬಿಣ್ ವಾಡ್ಯಾಕ್ ಫಾವೊ ಜಾಲೆಂ. ತಶೆಂಚ್ ದಾದ್ಲ್ಯಾಂಚಾ ದೊರಿ ವೊಡ್ಚ್ಯಾ ಸ್ಪರ್ಧ್ಯಾಂತ್ ಪಯ್ಲೆಂ ಸ್ಥಾನ್ ಸಾಂ ಪೆದ್ರು ವಾಡ್ಯಾಕ್, ದುಸ್ರೆಂ ಸ್ಥಾನ್ ನಿತ್ಯಾದರ್ ವಾಡ್ಯಾಕ್ ಆನಿ ತಿಸ್ರೆಂ ಸ್ಥಾನ್ ಪೊಂಪೈ ವಾಡ್ಯಾಕ್ ಫಾವೊ ಜಾಲೆಂ. ತಶೆಂಚ್ ಸ್ತ್ರೀಯಾಂಚ್ಯಾ ಸ್ಪರ್ಧ್ಯಾಂತ್ ಪಯ್ಲೆಂ ಸ್ಥಾನ್ ಪೊಂಪೈ ವಾಡ್ಯಾಕ್, ದುಸ್ರೆಂ ಸ್ಥಾನ್ ಲೂರ್ಡ್ಸ್ ವಾಡ್ಯಾಕ್ ಆನಿ ತಿಸ್ರೆಂ ಸ್ಥಾನ್ ಸಾಂ ಪೆದ್ರು ವಾಡ್ಯಾಕ್ ಫಾವೊ ಜಾಲೆಂ.
ಸಬಾರ್ ಫಿರ್ಗಜ್ಗಾರ್ ಮೈದಾನಾರ್ ಸಗ್ಳೊ ದೀಸ್ ಹಾಜರ್ ಆಸೊನ್ ಖೆಳ್ಗಾಡ್ಯಾಂಕ್ ಪ್ರೆತ್ಸಾಹ್ ದಿಲೊ. ಪಂದ್ಯಾಟಾವೆಳಿ ಜೀವನ್ ಲೋಬೊ ತಶೆಂಚ್ ಅನಿತಾ ಫೋನ್ಸೇಕಾ ಹಾನೆಂ ಕಮೆಂಟ್ರಿ ಸಾಂಗೊಕ್ ಕುಮೊಕ್ ಕೆಲಿ. ರೀನಾನ್ ಕಾರ್ಯೆಂ ಚಲವ್ನ್ ವೆಲೆಂ. ಆಧ್ಯಕ್ಷ್ ಪ್ರವೀಣ್ ಡಿಸೋಜಕ್ ಆನಿ ಸರ್ವ್ ಸಾಂದ್ಯಾಂಕ್ ಫಿರ್ಗಜ್ ಗಾರಾಂನಿ ಅಭಿನಂದನ್ ಪಾಟೆಯ್ಲೆಂ.
ಹ್ಯಾಚ್ ಫೆಬ್ರೆರ್ ೭ ತಾರಿಕೆರ್ ಆಯ್ತಾರಾ ದಿಸಾ ಲೊರೆಟ್ಟೊ ಫಿರ್ಗಜೆಚ್ಯಾ ಐ.ಸಿ.ವೈ.ಯಮ್ ಘಟಕಾನ್ ಫಿರ್ಗಜೆಚಾ ಸರ್ವ್ ವಾಡ್ಯಾಂಕ್ ಸಾಂಗಾತಾ ಹಾಡ್ಚ್ಯಾ ಖಾತಿರ್ ವಾಡ್ಯಾವಾರ್ ದಾದ್ಲ್ಯಾಂಕ್ ವಾಲಿಬಾಲ್ ತಶೆಂಚ್ ಸ್ತ್ರೀಯಾಂಕ್ ತ್ರೋಬೋಲ್ ಪಂದ್ಯಾಟ್ ಮಾಂಡುನ್ ಹಾಡ್ಲ್ಲೊ. ಆಮ್ಚಾ ಮೊಗಾಳ್ ವಿಗಾರ್ ಬಾಪ್ ಮಾ. ಸಿಪ್ರಿಯನ್ ಸಗ್ಳ್ಯಾ ಪಂದ್ಯಾಟಕ್ ಮೊಟೊ ಪಾಟಿಂಬೊ ಆನಿ ಉತ್ತೇಜನ್ ದಿಲ್ಲೆಂ.
ಹ್ಯಾ ದೊನೀ ಪಂದ್ಯಾಟಾಚಾ ಉಗ್ತಾವಣ್ ಕಾರ್ಯಾಕ್ ಫಿರ್ಗಜ್ ಉಪಾಧ್ಯಕ್ಷ್ ಜ್ಯೊ ಕುವೆಲ್ಲೊ. ಕಾರ್ಯದರ್ಶಿ ಹ್ಯೂಬರ್ಟ್ ಲೋಬೊ, ಸಲಹಾದಾರ್ ರೋಶನ್ ಪಿಂಟೊ ತಶೆಂಚ್ ಅಂಪಾಯರ್ಸ್ ಹಾಜರ್ ಆಸ್ಲ್ಲೆ. ಆಮ್ಚ ಫಿರ್ಗಜೆಚ್ಯಾ ಸಕ್ಕಡ್ ವಾಡ್ಯಾನಿಂ ಹ್ಯಾ ಪಂದ್ಯಾಟಾಂತ್ ಭಾಗ್ ಘೆತ್ಲ್ಲೊ. ವಾಲಿಬಾಲ್ ಪಂದ್ಯಾಟಾಂತ್ ಪಯ್ಲೆಂ ಸ್ಥಾನ್ ಲೂರ್ಡ್ಸ್ ವಾಡ್ಯಾಕ್, ದುಸ್ರೆಂ ಸ್ಥಾನ್ ಅರ್ಲಾ ಪಯ್ಲ್ಯಾ ವಾಡ್ಯಾಕ್ ಆನಿ ತಿಸ್ರೆಂ ಸ್ಥಾನ್ ಕುಪ್ರಾಡಿ ವಾಡ್ಯಾಕ್ ಫಾವೊ ಜಾಲೆಂ. ತಶೆಂಚ್ ತ್ರೋಬೋಲ್ ಪಂದ್ಯಾಟಾಂತ್ ಪಯ್ಲೆಂ ಸ್ಥಾನ್ ನಿತ್ಯಾದರ್ ವಾಡ್ಯಾಕ್ ದುಸ್ರೆಂ ಸ್ಥಾನ್ ಲೂರ್ಡ್ಸ್ ವಾಡ್ಯಾಕ್ ಆನಿ ತಿಸ್ರೆಂ ಸ್ಥಾನ್ ಕುಪ್ರಾಡಿ ವಾಡ್ಯಾಕ್ ಫಾವೊ ಜಾಲೆಂ.
ಸಕಾಳಿಂ ಥಾವ್ನ್ ಸಾಂಜ್ ಮ್ಹಣಾಸಾರ್ ಹೆಂ ಪಂದ್ಯಾಟ್ ಐ.ಸಿ.ವೈ.ಯಮಾನ್ ಚಲವ್ನ್ ವೆಲೆಂ ಫಿರ್ಗಜ್ಗಾರ್ ಸಗ್ಳೊ ದೀಸ್ ಖೆಳಾ ಮೈದಾನಾರ್ ವೀಕ್ಷಕ್ ಜಾವ್ನ್ ಹಾಜರ್ ಆಸ್ಲ್ಲೆ ಪಳೆವ್ನ್ ಸಮೇಸ್ತಾಂಕ್ ಸಂತೊಸ್ ಭೊಗ್ಲೊ ಆನಿ ಫಿರ್ಗಜ್ ಗಾರಾಂ ಮಧ್ಲೊ ಎಕ್ವಟ್ ಉಟೊನ್ ದಿಸ್ತಾಲೊ.
Popularity: 12% [?]
