ಕಥೊಲಿಕ್ ಸಭಾ ಆನಿ ಸ್ತ್ರೀ-ಸಂಘಟನಾಚೆಂ ಪಿಕ್ನಿಕ್
ಕಥೊಲಿಕ್ ಸಭಾ ತಶೆಂ ಸ್ತ್ರೀ ಸಂಘಟನ್ ಲೊರೆಟ್ಟೊ ಹಾಂಚೆಂ ಜಂಟಿ ಪಿಕ್ನಿಕ್ ೧೪.೦೧.೨೦೧೦ವೆರ್ ಬ್ರೇಸ್ತಾರಾ ದೀಸ್ ಯಶಸ್ವಿ ಥರಾನ್ ಚಲ್ಲೆಂ.
ಸಕಾಳಿಂ ೮.೩೦ ವೊರಾರ್ ಆಮ್ಚಾ ವಿಗಾರ್ ಬಾಪ್ ಮಾ. ಸಿಪ್ರಿಯನ್ ಪಿಂಟೊಚಾ ಮಾಗ್ಣ್ಯಾದ್ವಾರಿಂ ಪಿಕ್ನಿಕ್ ಪ್ರಾರಂಭ್ ಜಾಲೆಂ. ಹ್ಯಾ ಪಿಕ್ನಿಕಾಕ್ ವಿಗಾರ್ ಬಾಪಾ ಸವೆಂ ೩೧ ಸಾಂದೆ ಹಾಜರ್ ಆಸ್ಲ್ಲೆ. ಕಂತಾರಾಂ, ಪದಾಂ, ಹಾಸೊ, ಬಂಡಿ ಸಾಂಗಾತಾ ಲೊರೆಟ್ಟೊ ಥಾವ್ನ್ ಸುಟ್ಲ್ಲೆಂ ಪಿಕ್ನಿಕಾಚೆಂ ಬಸ್ಸ್ ೯.೪೫ಕ್ ಸುಲ್ತಾನ್ ಬತ್ತೇರಿ ಬೋಟ್ ಕ್ಲಬ್ಬಾಕ್ ಪಾವ್ಲೆಂ. ಥೈಂಸರ್ ಆಸ್ಲ್ಲೆಂ ಟಿಪ್ಪುಚೆಂ ಕೋಟೆಂ ಪಳೆವ್ನ್ ಮೋಟಾರ್ ಬೋಟಿರ್ ಮುಕ್ಕಾಲ್ ವೊರಾಚೆಂ ‘ಉದ್ಕಾ ವಿಹಾರ್’ಚೊ ಆನಂದ್ ಬೊಗ್ಲೊ. ಹ್ಯಾ ವೆಳಾರ್ ಬೊಟಿರ್ಚ್ ರುಚಿಕ್ ಕಾಪಿ ಫಳಾರಾಚಿ ವ್ಯವಸ್ಥಾ ಆಸಾ ಕೆಲ್ಲಿ.
ಉದ್ಕಾ ವಿಹಾರಾ ಉಪ್ರಾಂತ್ ಉದ್ಕಾ ಮಧೆಂ ಆಸ್ಚಾ “ಮ್ಹರ್ಜರ್ ದ್ವೀಪಾಕ್” ಪಾವ್ಲ್ಯಾಂವ್. ಥೈಂಸರ್ ಖೆಳ್, ಪೊಕಾಣಾಂ ದ್ವಾರಿಂ ಸರ್ವಾಂಕ್ ಮನೋರಂಜನ್ ಲಾಬ್ಲೆಂ. ಆಮ್ಚಾ ಮೊಗಾಳ್ ವಿಗಾರಾಂನಿ ಆಮ್ಕಾಂ ವಿವಿಧ್ ಖೆಳ್ ಖೆಳಯ್ಲೆ. ದೊನ್ಪಾರಾಂ ೧.೩೦ ವೊರಾರ್ ಸನ್ನಾ-ಮಾಸಾಚೆಂ ಜೆವಾಣ್ ಜೇವ್ನ್ ಸರ್ವ್ ಸಾಂದೆ ಸಂತೊಸ್ ಪಾವ್ಲೆ.
ದೊನ್ಪಾರಾಂ ೨.೩೦ ವೊರಾರ್ ದ್ವೀಪ ಥಾವ್ನ್ ಪಾಟಿಂ ಸುಲ್ತಾನ್ ಬತ್ತೇರಿ ಬೋಟಿರ್ ಆಯ್ಲ್ಯಾಂವ್. ಥೈಂ ಥಾವ್ನ್ ಪಣಂಬೂರ್ ಬೀಚಾಕ್ ಪಾವ್ಲ್ಯಾಂವ್. ದರ್ಯಾಚಾ ಉದ್ಕಾಂತ್ ನಾವ್ನ್ ತಡಿರ್ ಕಬಡ್ಡಿ, ಸಸಿಯಾಟ ಖೆಳ್ಚೆ ಸಂಗಿ ಚಡಾವತ್ ಸಾಂದ್ಯಾಂನಿ ಪಿಕ್ನಿಕಾಚೊ ಸಂತೊಸ್ ಭೊಗ್ಲೊ. ೫.೦೦ ವೊರಾಂಚೆರ್ ಪಾಟಿಂ ಬಾಯ್ರ್ ಸರ್ಲ್ಲ್ಯಾ ಆಮಿಂ ಮಧೆಂ ಪಂಪ್ವೆಲ್ ಪದ್ಮಶ್ರೀ ಹೊಟ್ಲಾಂತ್ ವಿಗಾರ್ ಬಾಪಾಚ್ಯಾ ಜಲ್ಮಾ ದಿಸಾ ಲೆಕಾರ್ ಕಾಫಿ ಫಳಾರ್ ಸೆವ್ಲೊ. ಪಾಟಿಂ ಯೆತಾಸ್ತಾನಾ ಬಸ್ಸಾರ್ ಪಿಕ್ನಿಕಾಚೊ ಸಂತೊಸ್ ಪದಾಂ ದ್ವಾರಿಂ ವ್ಯಕ್ತ್ ಕರ್ಚಾ ಮಧೆಂ ಕಥೊಲಿಕ್ ಸಭೆಚೊ ಅಧ್ಯಕ್ಷ್ ಶ್ರೀ ಸಿಪ್ರಿಯನ್ ಡಿ’ಸೋಜ ಹಾಣೆಂ ಪಿಕ್ನಿಕಾಕ್ ಹಾಜರ್ ಜಾಲ್ಲ್ಯಾ ವಿಗಾರಾಂಚೊ ತಶೆಂ ಸಮೇಸ್ತಾಂಚೊ ಉಪ್ಕಾರ್ ಬಾವುಡ್ಲೊ. ಪಿಕ್ನಿಕಾಚೊ ಉಡಾಸ್ ಜಿವೊ ದವರುಂಕ್ ಶ್ರೀ ಸುನಿಲ್ ಪಿಂಟೊನ್ ತಸ್ವಿರ್ಯೊ ಕಾಡ್ನ್ ಸಹಕರ್ಸಿಲೆಂ. ಕನಿಷ್ಟ್ ಧರಿರ್ ಪಿಕ್ನಿಕಾಕ್ ವಾಂಟೊ ಘೆತ್ಲ್ಲ್ಯಾ ಸರ್ವ್ ಸಾಂದ್ಯಾಂಕ್ ಹೆಂ ಪಿಕ್ನಿಕ್ ಉಡಾಸಾಂತ್ ಉರ್ಚೆ ತಸಲೆಂ ಜಾಂವ್ಕ್ ಪಾವ್ಲೆಂ. ಆಮೊರಿ ತೇರ್ಸಾ ದ್ವಾರಿಂ ಸೊಮ್ಯಾಕ್ ಅರ್ಗಾಂ ದಿಲಿಂ. ಸಾಂಜೆಚ್ಯಾ ೭.೧೫ ವೊರಾಂಕ್ ಪಾಟಿಂ ಲೊರೆಟ್ಟೊ ಪಾಂವ್ಚೆ ಸಂಗಿಂ ಆಮ್ಚೆಂ ಪಿಕ್ನಿಕ್ ಯಶಸ್ವೆನ್ ಸಂಪ್ಲೆಂ.
Popularity: 8% [?]
