ವೈ.ಸಿ.ಯಸ್ ಪಿಕ್ನಿಕ್
ತೊ ದೀಸ್ ಆಯ್ತಾರಾಚೊ ತಾರೀಕ್ ಫೆಬ್ರವರಿ ೧೪ ಯುವಜಣಾಂಚ್ಯಾ ಮತಿಂತ್ ಅಪ್ಲ್ಯಾ ಮೋಗ್ ಕರ್ಣಾರಾಂಕ್ ನಿಯಾಳ್ಳ್ಯಾರ್ ಆಮ್ಚಿಂ ೩೫ ಭುರ್ಗಿಂ ಗಡಾಯ್ ಫಾತೊರ್ ಚಡ್ಚ್ಯಾ ವಿಷ್ಯಾಂತ್ ಚಿಂತ್ತಾಲಿಂ. ಆಯ್ತಾರಾಚೊ ದೀಸ್ ಜಾಲ್ಲ್ಯಾನ್ ಮೀಸ್ ಜಾಲ್ಲೆಂಚ್ ಆಮ್ಚಾ ಮೊಗಾಳ್ ವಿಗಾರ್ ಮಾ. ಸಿಪ್ರಿಯನ್ ಪಿಂಟೊನ್ ಆಮ್ಕಾಂ ತಯಾರ್ ಕರ್ನ್ ದವರ್ಲ್ಲೊ ನಷ್ಟೊ ಕರ್ನ್ ಪಿಕ್ನಿಕಾಕ್ ತಯಾರ್ ಜಾಲಿಂ. ವಿಗಾರ್ ಬಾಪಾಂನಿ ತ್ಯಾ ದಿಸಾಚೆ ಗರ್ಜೆಚೆ ವಿಷಯ್ ಆಮ್ಕಾಂ ತಿಳ್ಸಿಲೆ. ಆಮ್ಚೆ ಸಾಂಗಾತಾ ಆಮ್ಚೆ ಸಚೇತಕ್ ಬ್ರದರ್ ಜೋಯ್ಸನ್ ಆನಿ ಶ್ರೀ ಕೇವಿನ್ ಡಿ’ಸೋಜಾ ಆಸ್ಲ್ಲೆ. ಇಗರ್ಜೆಚಿ ಗೇಟ್ ಉತಾರ್ಲಿಚ್ ಸುರು ಜಾಲಿಂ ಆಮ್ಚಿಂ ಪದಾಂ-ಬಂಡಿ, ಕಂತಾರಾಂ ಇತ್ಯಾದಿ. ತೊ ದೀಸ್ ಆಮ್ಚ್ಯಾ ಮೊಗಾಳ್ ಬ್ರದರಾಚೊ ಜಲ್ಮಾ ದೀಸ್ ಜಾಲ್ಲ್ಯಾನ್ ತಾಕಾ ಆಮಿ ಜಲ್ಮಾ ದಿಸಾಚೆ ಉಲ್ಲಾಸ್ಯೀ ಪಾಟಯ್ಲೆ. ಆಶೆಂ ಸುರು ಕೆಲ್ಲೆಂ ಆಮ್ಚೆಂ ಪಯ್ಣ್ ಬೆಳ್ತಂಗಡಿ ಬ್ರದರಾಚ್ಯಾ ಭಯ್ಣಿಗೆರ್ ರಾವ್ಲೆಂ. ಬ್ರದರಾಚ್ಯಾ ಭಯ್ಣಿಚ್ಯಾ ಕುಟ್ಮಾಚ್ಯಾನಿಂ ಆಮ್ಕಾಂ ಮೊಗಾಚೊ ಸ್ವಾಗತ್ ಕೆಲೊ ಆನಿ ಕಾಫಿ ಫಳಾರಾಚಿ ಮಾಂಡಾವಳ್ ಕರ್ನ್ ಸಂತೊಸ್ಭರಿತ್ ಕೆಲೆಂ.
೧೧.೩೦ ವೊರಾರ್ ವಿಗಾರ್ ಬಾಪಾಚ್ಯಾ ನಾಂವಾನ್ ಕುಟ್ಮಾಚ್ಯಾ ಸಕ್ಕಡ್ ಸಾಂದ್ಯಾಂಕ್ ದೇವ್ ಬರೆಂ ಕರುಂ ಮ್ಹಣ್ಚೆ ಸಾಂಗಾತಾ ಆಮ್ಚ್ಯಾ ಉಗ್ಡಾಸಾಚಿ ಲ್ಹಾನ್ಶಿ ಕಾಣಿಕ್ ತಾಂಕಾ ದಿಲಿ. ಸಕ್ಡಾಂಕ್ ಆದೇವ್ಸ್ ಮ್ಹಣೊನ್ ಆಮಿ ಧರ್ಮಸ್ಥಳ ಗೆಲ್ಯಾಂವ್.
ಹೊಕ್ಲೆ ನೊವ್ರ್ಯಾಕ್ ಆಯಾರ್ ದೀಂವ್ಕ್ ಲಾಯ್ನ್ ಆಸ್ಲ್ಲ್ಯಾ ಪರಿ ಜೆವ್ಣಾಚಿ ಲಾಯ್ನ್ ಲಾಂಬ್ ಆಸ್ಲ್ಲಿ ತರೀ ಜೆವಾಣ್ ಜಾಲ್ಲೆಂಚ್ ಸೊಭಿತ್ ಮ್ಯೂಜಿಯಮಾಕ್ ಗೆಲ್ಯಾಂವ್. ಥಂಯ್ ಆಮಿಂ ಪಳೆಂವ್ಕ್ ನಾತ್ಲ್ಲ್ಯೊ ಸಬಾರ್ ವಸ್ತು ಪಳೆಂವ್ಕ್ ಮೆಳ್ಳ್ಯೊ ಆನಿ ಅಸಲ್ಯೊ ವಸ್ತು ಆಸ್ಲ್ಲ್ಯೊಗಾಯ್! ಮ್ಹಣ್ ಮೊಸ್ತ್ ಆಜಾಪ್ ಭೊಗ್ಲೆಂ. ಥೊಡಿಂ ಜಣಾಂ ಸಾಂತೆಂತ್ ಆಸ್ಲ್ಯಾರ್ ಆನಿ ಥೊಡಿಂ ಪಾರ್ಕಾಂತ್ ಥೊಡಿಂ ಘುಮ್ಟ್ಯಾ ಸರ್ಶಿನ್ ಆನಿ ಥೊಡಿಂ ಟೆಂಪ್ಯಾರ್ ಬಸೊನ್ ವಿಶೆವ್ ಘೆತಾಲಿಂ. ಆಶೆಂ ಆಮ್ಕಾಂ ದಿಲ್ಲೆ ದೋನ್ ಘಂಟೆ ಅಮಿ ಧರ್ಮಸ್ಥಳಾಂತ್ ಖರ್ಚಿಲೆ. ಥಂಯ್ ಥಾವ್ನ್ ಉಜಿರೆ ಇಗರ್ಜೆಕ್ ಭೆಟ್ ದಿಲಿ. ಥಂಯ್ ಥಾವ್ನ್ ಆಮ್ಚೊ ಟೆಂಪೊ ಗೆಲೊ ಬೆಳ್ತಂಗಡಿ ಆಸ್ಚ್ಯಾ ಗಡಾಯ್ ಫಾತ್ರಾಚ್ಯಾ ಮುಳಾಂತ್. ಕೆವಿನಾನ್ ಗಡಾಯ್ ಫಾತ್ರಾಚೊ ಮಹತ್ವ್ ವಿವರ್ಸಿತಾನಾ ಆಮಿಂ ಏಕ್ ಘಡಿಯೆ ಹಿಸ್ಟರಿ ಕ್ಲಾಸಿಂತ್ ಆಸಾಂವ್ಗಾಯ್ ಮ್ಹಣ್ ಭೊಗ್ಲೆಂ. ಟೆಂಪ್ಯಾರ್ ಥಾವ್ನ್ ವ್ಹಡಾ ಉತ್ಸವಾನ್ ಸಕ್ಲಾ ದೆಂವೊನ್ ದೀಷ್ಟ್ ಉಬಾರ್ತಾನ ದಿಸ್ತಾ ಗಡಾಯ್ ಫಾತೊರ್. ಉದ್ಕಾಚೆ ಬೊತ್ಲ್ಯಾ ಘೆವ್ನ್ ಚಡೊಂಕ್ ತಯಾರ್ ಜಾಲ್ಯಾಂವ್.
ಮೌಂಟ್ ಎವರೆಸ್ಟಾಕ್ ಚಡ್ಲ್ಲ್ಯಾಬರಿ ಅಮಿಂ ಗಡಾಯ್ ಫಾತ್ರಾರ್ ಚಡೊಂಕ್ ಸುರು ಕೆಲೊ. ಪುರಾಸಣ್ ಜಾಲ್ಯಾರೀ ಜೋಕ್ಸ್, ತಮಾಷ್ಯೆ, ಅನುಭವ್ ಅನಿ ಕಷ್ಟ್-ದೂಖ್ ಎಕಾಮೆಕಾ ವಾಂಟುನ್ ಮುಕಾರ್ ಗೆಲ್ಯಾಂವ್ ಆನಿ ಫಾತ್ರಾಚ್ಯಾ ತಕ್ಲೆಕ್ ಪಾವ್ಲ್ಯಾಂವ್. ವರ್ತೊ ಸಂತೊಸ್ ಭೊಗ್ಲೊ. ಥಂಯ್ ಬಸೊನ್, ನಾಚೊನ್, ಖೆಳೊನ್ ಆಮ್ಚೊ ಸಂತೊಸ್ ಪರ್ಗಟ್ ಕೆಲೊ. ಥಂಯ್ ಥಾವ್ನ್ ಸಕ್ಲಾ ದೆಂವೊನ್ ಲೊರೆಟ್ಟೊಚಿ ವಾಟ್ ಧರ್ನ್ ಸಾಂಜೆರ್ ೭.೩೦ ವೊರಾರ್ ಇಗರ್ಜೆಚ್ಯಾ ಗೆಟಿ ಭಿತರ್ ರಿಗ್ಯಾಂವ್. ಆಶೆಂ ಆಮ್ಚೆಂ ಏಕ್ ದಿಸಾಚೆಂ ಪಿಕ್ನಿಕ್ ಶಾಭಿತ್ ರೀತಿನ್ ಜಾಲ್ಲ್ಯಾಕ್ ಲೊರೆತ್ ಮಾಯೆಕ್ ಅರ್ಗಾಂ ದಿತಾಂವ್.
ಇತ್ಲೆಂ ಆಪುರ್ಬಾಯೆಚೆಂ ಪಿಕ್ನಿಕ್ ಆಮ್ಕಾಂ ಮಾಂಡುನ್ ಹಾಡ್ಲ್ಲ್ಯಾ ಆಮ್ಚ್ಯಾ ಮೊಗಾಚಾ ವಿಗಾರಾಂಕ್, ಸಚೇತಕ್ ಶ್ರೀ ಕೆವಿನಾಕ್ ಆನಿ ಬ್ರದರಾಕ್ ಆಮಿಂ ಆಭಾರಿ ಜಾವ್ನಾಸಾಂವ್. ತಾಂಕಾಂ ದೇವ್ ಬರೆಂ ಕರುಂ ಮ್ಹಣ್ತಾಂವ್.
Popularity: 6% [?]
